ШЕСТАТА ОДБРАНА НА ДОКТОРСКА ДИСЕРТАЦИЈА ОДРЖАНА НА МЕЃУНАРОДНИОТ УНИВЕРЗИТЕТ ВИЗИОН

Есра Баки, студентка на Докторската програма по Клиничка психологија на Меѓународниот универзитет Визион, успешно ја одбрани својата докторска дисертација и стекна академска титула „Доктор на науки“.

Со својата дисертација со наслов „Улогата на тешкотиите во емоционалната регулација во врската помеѓу траумите од детството, депресивните симптоми и самоповредувачкото однесување кај универзитетските студенти“, Баки ги обработи важните психолошки процеси што влијаат на менталното здравје на младите лица преку научен пристап.

Во своето истражување, таа ја испитуваше врската меѓу траумите од детството и депресивните симптоми и самоповредувачкото однесување кај студентите, со посебен фокус на медијаторската улога на тешкотиите во емоционалната регулација.

Одбраната на докторската дисертација на Есра Баки се одржа пред комисија составена од еминентни академици од областа. Комисијата за одбрана беше составена од следниве членови:

Проф. д-р Фатмагул Чирхилнлиоглу (ментор

Проф. д-р Муса Мусаи (претседател на комисијата)

Проф. д-р Лупчо Кеверески (член)

Проф. д-р Абдулмечит Нуредин (член)

Проф. д-р Муедин Кахвеџи (член)

По едногласната одлука на комисијата, Баки ја доби докторската титула во областа на Клиничката психологија.

Која е Есра Баки?

Родена во 1996 година во Гостивар, Есра Баки го завршила своето основно образование во Основното училиште „Бирлик“ и Основното училиште „Мустафа Кемал Ататурк“, а средното образование во Општинското здравствено стручно училиште БМСЛ.

Во 2015 година се запишала на катедрата за Психолошко советување и насочување на Меѓународниот универзитет Визион и дипломирала во 2019 година.

Истата година започнала магистерски студии на истата катедра. Својата магистерска теза со наслов „Психолошките ефекти на пандемијата и стресот врз поединците и стратегии за справување со стресот“ успешно ја одбранила во 2020 година и била прогласена за најдобар студент во генерацијата.

Во 2021 година започнала докторски студии по Клиничка психологија, а воедно работи и како истражувач на Катедрата за психологија на универзитетот. Со своето учество на многубројни семинари, обуки и терапевтски работилници, таа постојано го унапредува своето професионално знаење и вештини.